القيمة المحورية للشخصية
( الحلقة الثالثة ) من سلسلة انواع الشخصية و كيفية التعامل معها .
بقلم / أمل منيسي
هذا الموضوع طويل ولكنه في منتهي الاهمية لفهم الحلقات الاربعه القادمة والتي سوف نتناول بها انواع السخصية بالتفصيل .
في حاجة اسمها 🌛القيمة المحورية للشخصية🌜 بمعني أخر مفتاح الشخصية.
القيمة دي الي بيتصرف علي اساسها الطفل دون تفكير مسبق ، بشكل تلقائي.
لو اتفهمت صح و تم دعمها من الاهل هتكون سبب جودة العلاقه بينكم وهتكون كمان سبب نجاح الشخص ده في كل حاجة بعد فضل ربنا طبعا.
وللاسف برده لو مش فاهمه القيمة دي ومستوعباها هتدخلي دايما في صدام ومشاكل والنتيجة فشل سواء ليكي او لابنك.
وخلي بالك القيمة دي مبتتغيرش. يعني مينفعش تفكري مثلا انك تبدليها لابنك. انتي بس افهميها كويس.
القيادي. القيمة هي (النتيجة)
المحلل. القيمة هي. (الجودة والاتقان)
الودود. القيمة هي (السلام والامان)
المعبر. القيمة هي. ( الحرية والتميز)
طريقة تفكير الطفل او حتي اي شخص كبير. بتعتمد اساااااسا علي القيمة المحورية الخاصه بيه. ودايما التفكير بيكون في شكل سلسله من العناصر المتتاليه الي لو وقف منهم واحد التفكير كله بيتشل ويقف تماما ويؤدي للفشل.
نركز في الكلام الي جاي علشان تفهمي الفرق بين تسلسل تفكيرك انتي. وتسلسل تفكير ابنك الي لو مختلفين هتقفوا عند نقطة او عنصر معين وتبدا مشكله بينكم توقف اي حاجة حلوة ممكن تتعمل.
هناخدهم بالترتيب
( سلسلة تفكير القيادي) المفتاح هو النتيجة😎
1-هيفكر في النتيجة او الحاجة الي عايزها.
2-هيحط لنفسه خطوة بداية
3-هيعمل حسابه ايه المشكله الي ممكن تقابله في البداية.
4- هيفكر هيحل المشكله دي ازاي.
هنا بقي حاجة مهمة. الحل الي بيفكر فيه القيادي ده حاجة اسمها (الرؤية المستقبلية) بمعني الوسيلة. ودي بقي مهم جداااااا ناخد بالنا منها بالذات مع القيادي.
القيادي شخص بيشوف هدفه وبس و عايز نتيجة وبس. بالتالي هو لو مقابلوش طريقه مشروعه. هيلجأ لاي شيء. علشان كده بنشوف ناس في حياتنا ممكن تدوس علي اي حد بس في سبيل النتيجة.
الرؤية المستقبلية مسؤولية الاب والام. انتي بالذات كأم هتقدري بالتربية تدخلي القيم الصالحة لابنك. طريقته والوسائل بتاعته لازم تكون بما يرضي الله. مش بس مهم النتيجة لان الطريقه ممكن تأذي غيرك او تغضب ربنا او اهلك. حطي دايما قدام عنيه ان الهدف الاسمي والنتيجة الاهم في الحياة هي رضي ربنا والجنة. بالتالي رؤيته المستقبلية تكون بشكل لا ارادي صالحة دايما.
5- عرفت الوسيلة خلاص طيب هحط خطة و ادارة للوقت و هحدد محتاج فريق عمل ولا لاء. ولو في فريق عمل فطبعا انا دوري هيبقي الاشراف واعطاء التعليمات .
6- مراقبه ومتابعة النتايج.
🌴 مثال 🌴 ( الملاهي )
-عايز اروح الملاهي (دي النتيجة الي عايزها)
-خطوة البداية. هطلب من ماما.
المشكلة المتوقعه. ماما او بابا ممكن يرفض
-ماشي هحل المشكله ازاي.
(رؤية مستقبلية جيدة)
هتكلم مع ماما واقنعها. وممكن اخليها تقنع بابا
هتناقش مع بابا واعرف اسبابه واحاول احلها
لو المشكله مادية. هحوش من مصروفي لحد ما اكمل المبلغ. او ممكن ابدل الفسحة دي بحاجة تانيه كنت طالبها ومش عايزها خلاص.
في اسوا الاحوال يستبدل الهدف بواحد تاني يديله نفس درجة الرضا.
وده مش هيحصل الا اذا كانت رؤيته المستقبليه صالحة و اسبابكم للرفض صحيحة ومقنعه وباسلوب يحترمه.
(رؤية مستقبلية غير سوية)
هزن وهعيط
هفضل اوجع دماغ ماما لحد ما تروح تقنع بابا علشان تخلص من زني
هكسر اي حاجة قدامي علشان اعاقبهم
لو طفل كبير شويه او مراهق. هيسرق فلوس ويخرج ويحقق هدفه غصب عن اي حد.
(( الرؤية المستقبلية يا جماعة هي الشيء الي لو اتبني صح بقيم جيدة ترتاحوا عليها في اصعب فترة من حياة ولادنا (فترة المراهقه)
عودوهم ان مفيش مكان للخوف بينكم. في نقاش وتفاهم وحب. في ان ربنا شايفنا طول الوقت. عاملي ابنك او بنتك اكنك بتعاملي صحبتك اكيد مش هتجبريها علي حاجة لا هتضربيها او تحبسيها في اوضه ضلمة لو خالفتك فب الراي او العدف. ابنك اهم من صحبتك ويستحق الاخترام ده الاول.
– القيادي بقي بعد ما كون رؤيته هيبدا يحط خطة للوقت انا هنفذ امتي وحد محتاجة معايا ولا لاء و يتابع النتيجة.
- سلسلة تفكير المحلل ( المفتاح الجودة والاتقان.) 👌🍴
- لمي تجيله فكرة. هيفكر الاول هي اصلا حلوة ولا لاء. مفيهاش حاجة غلط ؟ يعني هيبقي شكلي كويس لمي اطلبها ؟
- طيب تمام الفكرة حلوة. طب اخد راي حد بثق فيه كده. ماما هو الفكرة دي حلوة ؟ اه جميله اوك موافقه.
طب اتاكد انها حلوة فعلا. اسال مين ياتري. ايوه هسأل جدو. لان طبعا جدو اقرب حد لبابا وهيقدر يعرف راي بابا من قبل ما اساله.
-جدو قال تمام وزي الفل
(هنا الطفل اتاكد الاول من جودة الفكرة وسال خبرات سابقه واثق فيها اصلا مش هيسال اي حد)
-دلوقتي هيبدا يحط خطة ونظام لعرض فكرته علي باباه وهيراعي جدا القواعد الاسرية والعادات والتقاليد الي اتعلمها. وهيسال الي هيعمله ده حاجة ترضي ربنا ولا في اي حاجة غلط.
( ارجوكم متحاولوش تستجوبوا الطفل ده قدام حد. اي حاجة تحصل محتاجه عنها تفاصيل خليها بينك وبينه مفيش اي طرف معاكم. ارجوكم محدش يتريق ابدا علي اي كلام لطفل محلل لانها بتكسره تماما)
(المحلل شكاك. تحملي الاساله الكتير. حضريله اجابات موثوق فيها. ارجعي دايما للحقائق والارقام والخبرات علشان تثبتيله معلومة معينه) متقوليش انا بقول كده يبقي كده. غصب عنه مش هيعرف يصدق. هو ربنا خلقه كده.
ملحوظة . معظمهم شاطرين دراسيا جدا.👏👏
المثال 🌴 الملاهي 🌴
-عايز اروح الملاهي. ياتري دي فكرة حلوة ولا مش اوي ممكن اعمل حاجة افيد منها.
– ياتري لو طلبت من ماما هتقول اه دي فكرة كويسه ولا هيبقي شكلي وحش ؟
– هو انا كده انسان كويس وربنا بيحبني ولا هبقي بضيع وقت وخلاص.
– انا هسال ماما هي اكتر حد هيفيدني. ماما قالت الفكره حلوة. تماما تبدا تزيد ثقته بنفسه اكتر. بس التردد لسه موجود.
– هروح اسال جدو كمان هو عارف دماغ بابا وهيجيب المفيد. تمام جدو قال فكرة محترمة.
– اتاكد ان فكرته تمام بعد سؤال المصادر الموثوق فيها بالنسبه له واكثر خبرة ودراية.
يبدا يحط خطة. امتي افضل وقت اعرض فكرتي علي بابا. هبدا كلامي بايه و ايه الاساله الي ممكن بابا يسالها و يدور علي كل الاجابات بالاستعانه بمصادر موثوقه.
( خلوا بالكم من الجزء ده المحلل معتمد علي المصادر والمعلومات فلو المصادر الي بيلجأ لها فاسدة تصرفاته هتبقي غلط وعن قناعه واصرار. زي صاحب سوء او مواقع انترنت صفراء. فمهم دايما اننا نوجهم ونعلمهم من بدري ان مش كل حاجة بتلمع ذهب. و ازاي اختار مصدري صح)
( مشكله تانيه برده ممكن تقابله دايما انه من كتر التفكير والتفاصيل والاسالة والشك. يقف ميكملش . هو متاكدش من جوده الفكرة. فيأس بدري. شجعوهم و حفزوهم باستمرار )
- لو ربنا كرمه و وصل للجوده المطلوبة عنده لتحقيق الفكره و موقفش وكمل عادي. هيروح لوحده تماما لبابا ويقفل الباب علشان محدش يبقي معاهم ويتكلم بمنتهي الجديه الي مليانه ادب والفاظ منتقاه و تعبيرات مرتبه ودقيقه. واحتمال يكون عامل ورقه فيها جدول بكل تفاصيل الخروجة الي عايزها. 😅👍👏
=================================
* سلسلة تفكير الودود . المفتاح ( الامان والسلام )❤
1-لمي يكون عايز حاجة هيفكر هتحققله امان ولا لاء الاول. مطمن ولا لاء.
2- توازن مع كل الاطراف. الناس كلها تمام وهيكون في توافق ولا ممكن تحصل مشاكل بسبب فكرته.
3- الانسانيات. الحاجة دي هنشارك فيها ناس بحبهم و هنتجمع وهنبقي سوا كلنا وهنقضي وقت في حب وسعادة. (بغض النظر بقي دي حاجة مفيده او جيده ولا لاء مش مهم)
4- الشوري. هيستشير الناس الي بيحبهم. (بغض النظر ليهم في الموضوع ده او بيفهموا فيه ولا لاء) ميهموش الجوده. المهم ان دول الي بيحبهم وبيطمنلهم.
5- هيحتاج الدعم ويدور عليه.
6- الترتيب والتنظيم بقي اخر حاجة.
المثال. 🌴 الملاهييييييي 🌴
– جتله الفكره هيروح لماما علطول فورا منغير اي تفكير اساسا. (ماما انتي موافقه نروح الملاهي ؟ ولا ممكن تزعقيلي او تضربيني ووشه كله توتر. ويمكن يدمع احتياطي
(علي فكره هو مش بيمثل هو مشاعره رقيقه للدرجة دي فبلاش نقابل ده بجملة بطل دلع انت راجل. او بطلي سهوكة يا بنت واتعدلي) هما مش كده هما كتلة مشاعر متحركة. فمينفعش تطلبي منه يوقف شعور مش هيعرف يوقفه وهيحس انه كده انسان وحش او ضعيف ويلوم نفسه ويفقد الثقه في نفسه اصلا.
– ماما طلعت مش هتزعل الحمد لله واخدتني في حضنها وطبطبت عليه وقالتلي فكرة حلوة.
– طب ممكن بابا يزعل ؟ ممكن جدو يزعل ؟ طب تيته ؟ طب الجيران 😄
– كل الناس والعالم في سلام نفسي ومحدش زعلان من فكرتي (احمدك يارب)
– تمام مين هيشجعني بقي. مين يساعدني وانا بقول لبابا. ماما تعالي معايا وامسكي ايدي او اقعد علي رجلك واحضنيني وانا بكلم بابا. ماما ماما متقوليله انتي والنبي وانا هقف بره 😰
- للضمان بقي ممكن يسال ويستشير اي حد من صحابه بيحبه هو لمي طلب من باباه قبل كده طلب مشابه حصل ايه.
هو كده عمل كل ما يستطيع لتحقيق الامان و انه يبقي مطمن لفكرته وانها كويسه ومش هتزعل حد.
يبدا بقي يستاذن بابا الاول انا ممكن اطلب طلب ؟ وممكن قبلها شويه بوس واحضان لو كان الاب قريب من ابنه. لكن لو اب ناشف لازم هيبقي الام طرف وسيط.
الودود ميحبش المواجهات مع الناس الناشفه او القاسيه. الودود محتاج دعم عاطفي مستمر. حب حب حب غييييير مشروط و احضان كتير.
الطفل ده محتاج نعلي ثقته بنفسه دايما ونعمله حاجات تخليه يحس انه انسان ليه لازمة والناس بتحبه وبتدعمه زي انه لو بيعرف يرسم حلو صوريله الي بيرسمه واعمليله بيدج خاصه بيه اونلاين واعرضي اعماله الصغيره ووريه كلام الناس عنه قد ايه حلو وقد ايه هو انسان مبهج.
في رأيي النوع ده بيحتاج يلعب رياضه فيها دفاع عن النفس. . لانه من الاطفال الي ممكن تنضرب وتسكت وتسيب حقها لاعتقاده الدائم انه اضعف من الباقيين. فلازم يكون عنده حاجة يملكها تديله الامان.
================================
سلسلة تفكير المعبر. مفتاحه 😜( الحرية والتميز) 💃👻
– مبدئيا المعبر مينفعش نقول جاتله فكرة. المعبر كل ثانيه بفكره جديدة. دماغه طول الوقت بتفكر في الابتكار.
– طب طقت دلوقتي فكرة محدده. امممممم الفكرة دي عادية ولا حاجة كده wooow…. طيب عموما هي حتي لو عاديه ممكن اعملها بطريقة تخليها مميزة. ⚡⚡
– طيب كده الموضوع مميز وفي ابداع. ياتري بقي في حرية ؟ ولا في حد خنيق هيسيطر عليه وعلي افكاري ؟؟؟
( هنقف هنا بقي شويه لان دي هي مشكلة المعبر. الي للاسف مش فيه هوه. المشكله فينا احنا ، في البيت والمدرسة والنادي والمجتمع والقرايب ، في اي حد هيرد علي فكرته بكلام عن العادات والتقاليد و ميصحش او مينفعش الي بتبقي منغير سبب مقنع وحقيقي ، لان هيرد عليكم بسؤال… ليه مينفعش. ليه لاء ؟ الي كتير مش هتلاقولها اجابه غير انكم تتعصبوا و هو كده وخلاص. ادي لنفسك وقت تفكري بهدوء. هو ليه مينفعش صحيح ؟؟؟؟!!!!!
– بعد كده هنيجي لنقطة التعبير الي هي لعبته اصلا. قوة تعبير وذكاء لغوي عالي جدا. هيعبر وهيشرح فكرته بكل قوة وثقه وحماس.
( ارجوكي اسمعيه وطولي بالك حاولي تشاركيه حماسه وانه فعلا انسان مميز بافكاره ودماغه عبقرية حتي لو مش ناويه توافقي. بس تعالي في صفه الاول) وواحده واحده تبدأي تعرضي قدامه شويه اساله توجهه للتفاصيل الي هو مبيشوفهاش اصلا فانتي كده بتساعديه وبتعلي الجزء المحلل عنده علشان ميوقعش نفسه في مشاكل. يعني كوني في ظهره حمايه ليه من دماغه الي مبتهداش.
المعبر انسان يفتقد للتفاصيل والحسابات فمتتخيليش انه همجي او عايز يتبسط وخلاص او مبيحسش بحد او بالظروف. هو مش اخد باله فعلا. بمنتهي الهدوء والحب انتي الفتي نظره للي مش قادر يشوفه ولو اسلوبك حلو ومحسستيهوش انك بتتحكمي فيه وخلاص. هتكسبيه 100 %
– المعبر بيحب العلاقات الاجتماعيه و الصحبه الحلوة فيحب يشارك معاه ناس كتير و الي عايز ييجي يلا بينا وبقلب جامد.
– المرونة. عاليه عنده فلو الفكرة باظت لاي سبب هيغيرها في ثواني وهتلاقي قدامك افكار لا تعد ولا تحصي وكلها (out of the box )
وده خلي بالك هيحتاج منك الوضوح والصراحة دايما. يعني لمي يطلب حاجة وتبقي هترفضيها قولي سببها الحقيقي. لان السبب الي هتقوليه هيحله فلو مش حقيقي هيبقي شكلك وحش وهيوصله احساس انك بتتلككي وخلاص وهيتمرد.
مثال. الملاهي. 🙅
– انا زهقان بقالي يوميييين مروحتش الملاهي. ماما يلا نروح الملاهي ( كده خبط لزق) .
-الام : يا فتاح يا عليم يا رزاق يا كريم. يا ابني اهدي واصطبح ده احنا ملحقناش نرتاح من فسحة باليل.
– 😕 خلاص خلاص رايح لبابا.
بابا بابا بقولك انا عايز نروح الملاهي بس جاتلي فكرة بقي مختلفه تماما. احنا نشوف ملاهي في بلد تانيه. اممممم استني دقيقتين اعمل search في السريع وارجعلك بالمفيد.
(الاب ملحقش يرد اصلا هو مبلم ومستني القنبله الي جايله بيها العبقري)
- راجع بقي بمنتهي الحماس بعد ما كمل فكرته ( اديله فرصه يشرح ويتكلم. متقفلش الحوار)
- خلاص هو قال الي عنده واخد مطلق الحريه في العرض. ادخله انت بقي بالتفاصيل. طب المكان ده فين بالظبط ؟ مواعيده ايه ؟ التكلفه كام ؟ طب وتفتكر تكلفه السفر نفسها كام ؟ وهنروح ازاي ومع مين ؟
- كده انتي موقفتيش قدامه او قدام فكرته. يعني هو مازال حر. انتي بس بتستفسري وبتوضحيله معوقات ممكن تقابلكم.
طبعا هو هيوجد اجابات كل ده فلو الكلام منطقي ومناسب يبقي خلاص نفذي ووافقي.
اما لو مش هينفع فهنقول السبب الحقيقي. متتحججيش بالوقت او ان يوم الجمعه ده عندنا زيارة جدو. في حين ان مشكلتك في التكلفه. هيرد عليكي يقولك اوووك نخليها السبت او ايه رايك يلا بكره علطول. لو رجعتي قلتي لا برده هيسال ليه و لو غيرتي وقتها السبب مش هيصدقك بسهوله لانك غيرتي السبب مرتين.
من الاول قوليله حبيبي فكرتك جميله ومختلفه و ان شاء الله نعملها واوعدك بده بس اول ما يكون تكلفتها متوفره معانا وزايده عن احتياجاتنا الاساسيه.
دلوقتي بقي ورينا بافكارك الجميله البديل الممكن والاقل تكلفه .
الكلام ده هينفعه في حياته كلها وهيعرف ان مش كل حاجه هتطق في دماغي هقدر اعملها وفي نفس الوقت ممكن برده افضل سعيد عن طريق ايجاد البدايل. ميبقاش انسان عنده حلم في حياته لو وقف او باظ يحس انه انتهي و حياته تقف.
*** لو قدرت تقري الموضوع للاخر تقدر تقول شايف ابنك فين من دول. او حتي بالتقريب
انتظرونا في الحلقة القادمة مع النوع الاول بالتفصيل. ( القيادي )