بقينا في سبتمبر و هلت ريحة الشتا و معاها روايح المدارس و الشنط و الكراسات
تعالوا نتكلم شويه في حاجه مهمه اوي . اهم من لبس المدرسة و الادوات و ال supplies list الي بقت بالانجلش معرفش امتي وليه .
مش هنتكلم عن الطفل و لا مطلوب منه ايه .
هنتكلم عن الام و عن المدرسات و المدرسين .
- اولا عزيزتي الام :-
ابنك او بنتك رايح يتعلم مش رايح يجيب الدرجات النهائية ولا مستقبله هينهار لمي ينقص في الدرجات .
ابنك ممكن جدا ميكونش بيحب اللغات بس بيحب الحساب و الارقام . ويجوز مبيحبش اي حاجه في دول بس مميز اوي في الرياضه او الموسيقي .
ربنا سبحانه وتعالي ادي لكل بني ادم ملكة و موهبه و طول ما الطفل بيعمل حاجه بيحبها هينجح فيها .
مش مطلوب منك عزيزتي الام غير انك تعرضي علي ابنك كل المجالات و تخليه يعرف ويجرب و لو حب يكمل ، محبش نشوف غيره .
وصدقيني ده مش تضييع وقت بالعكس انتي بتكسبي في النهايه انك تبقي ساعدتي ابنك يوصل لمكانه الصح بدري . قبل ما يكون عمره كله وشبابه فات وعدي و هو لسه بيدور هو انا موهوب في ايه ، و ليه كاره شغلي ، و ليه مش مبسوط حتي لو ناجح .
الدراسة مش كل حاجه بالعكس هي وسيله فقط علشان الطفل ده يقدر يتعلم و يوصل لكل حاجه حلوه بيحلم بيها .
بيتعلم علشان يقري علشان يتثقف علشان يكون ويجمع معلومات تتخزن و تخرج في صورها الصح لمي يكبر و يكون مسؤول .
مش بيروح المدرسة علشان لازم يجيب الدرجات النهائية في كل المواد و لو محصلش يا يتعاقب و تبدا ثقته في نفسه وقدراته تختل، يا نروح المدرسة نلوم و نتخانق .
حاولي دايما تركزي ان هدفك هو انسان مثقف ذو شخصية سويه ،اخد حقه في الاحساس بالحرية في اختياراته .
اتعبي مع ابنك في عرض كل المجالات عليه من علوم و رياضه وفنون و تكنولوجيا . و سيبيه يختار هو حابب يكون مميز في ايه . وجهيه وراقبي اهتماماته ، ادعميه ، قوي ثقته بنفسه ، علميه يختار صح ازاي ، قوي مهاراته ، اهتمي بتغذيته السليمة وصحته ، اتكلمي معاه كل يوم في شكل يومه كان ايه و مين صحابه ولعب مع مين و اكتشفي الشخبطة الي بتحصل في شخصيته كل يوم اول بأول من تعاملاته مع الآخرين ، اهم ما تساليه اول ما يرجع اخدت ايه النهارده وعندك واجب ولا لاء .
باختصار حافظي علي النعمة الي ربنا ادهالك هتلاقي ربنا كرمك في ابنك او بنتك و هيكونوا افضل ما كنتي بتتمني . -
اما السادة الافاضل المدرسات و المدرسين .
لكم مني كل التقدير والشكر علي كل ما تبذلون ، ولكن …
وظيفة حضرتك مش انك تدخل الفصل تلقي بعض المعلومات و تخرج ، ولا اهم حاجه في الكون ان المنهج لازم يخلص في معاده علشان نلحق نراجع بسرعه بسرعه قبل الامتحان علشان درجات ولا ليها اي لازمه ولا علاقه بمستقبل الطفل ده الحقيقي .
هو لو جاب درجات نهائية طول عمره بالخوف هيكبر وهيبقي دكتور متردد او ظابط جبان . كده استفدنا ايه ؟ لقب ؟ ولا هل اهم حاجه نسبة نجاح تتباهي بيها المدارس و المدرسين ؟
حضرتك بتعلم و بتربي .
اولا بتعلم يعني مش مفترض ابدا الطفل الي قدامك يكون اصلا عارف المعلومة الي بتشرحها ، بتعلم يعني شرح و تدريب ، تشرح مره و اتنين و تتاكد الطفل قادر يستوعب و اتدرب علي المعلومة و استقرت في ذهنه .
هتقولي وقت الحصه هقولك لو الاطفال فهمت نص الدرس بس افضل ما تكرررر الدرس كله منغير ما تفهم اي حاجه .
بالعقل لو مقدرتش تحصل ال ١٠٠% هتختار ٥٠ ولا الصفر .
في مدرسين كتير في المدارس لكن مش كلهم اتخلقوا علشان يكونوا معلمين ، ملهمين لغيرهم ، قدوة لكل طفل . خلوا الاطفال تحبكم و يبقي عندهم هدف يكونوا زيكم زي ما كنا احنا بنحب مدرسينا زمان . ليه تخليتوا عن مكانتكم في قلوب الاطفال و اذهانهم .؟!!!! فهي اسمي ما في هذه المهنه .
ثانيا التربية . كل ام تترك ابناءها فتره ليست قصيرة من الزمن بين ايديكم و هي في كامل الثقه فيكي انتي كمربية و معلمة .
لا تتركوا الاطفال يمارسون التنمر علي بعضهم البعض بحجة انها شقاوة اطفال او ( و ايه يعني هيحصل بيلعبوا وبيغلسوا شويه علي بعض ) فبمنتهي البساطة التنمر يؤدي في اسوا صوره للانتحار و ابسطها الي فقدان الثقه بالنفس .
استوعبوا شخصيات الاطفال واختلافاتها . اقروا عن علم الشخصيات كتير . تعاملك مع طفل قيادي يختلف تماما عن التعامل مع طفل ودود .
في فرق كبير جدا بين طفل عنده فرط حركة او يحتاج تعديل للسلوك و بين طفل معبر نمط شخصيته يفرض عليه تصرفات و حركات لا ارادية .
استوعبوا الاطفال بانماطهم و شخصياتهم و ردود افعالهم المختلفه علشان تقدروا تتعاملوا معاهم بشكل امثل ومريح ليكم و ليهم .
ارجوكم قبل ان تنعتوا الاطفال باي صفات حاولوا تفهموا الاسباب ، يعني لو في طفل مبيفهمش الدرس بسهوله زي غيره ممكن جدا يكون في شيء اخد تفكيره ، ربما لانه طفل خياله واسع او يكون معرض لمشكلة نفسية .
يجوز الطفل ده بيحتاج وقت اكبر في الفهم لكن تركيزه اعلي و ذاكرته اقوي من طفل لقط المعلومة بسرعه و نسيها بشكل اسرع .
مع بدايه التعامل مع اطفال جداد حاولي تاخدي وقت اسبوع او اتنين حللي فيهم شخصيات ابناءك الجداد ، اختاريلهم اسامي و القاب تشجيعية . اعتبريهم شركاء نجاحك وتميزك في هذا العام . واصبري ، هتكون النتيجة اروع مما تتخيلي .
” بقلم / أمل منيسي “
مجلة صبايا 